Pichle chapter me humne life processes ke baare me padha tha, jo living organisms ki body ko maintain karte hain, jaise nutrition aur respiration. Matlab body ko chalaye rakhne ke basic kaam.
Hum usually sochte hain ki agar koi cheez move kar rahi hai to wo zinda hai. Lekin ye hamesha sach nahi hota.
Plants me jo movement hota hai wo actually growth ki wajah se hota hai. Jaise ek beej germinate karta hai, yani ugta hai, aur dheere dheere plant ban jata hai. Jab plant grow karta hai to wo soil ko push karke bahar aata hai.
Agar plant ki growth ruk jaye, to uska movement bhi ruk jayega. Iska matlab plants ka movement directly growth se connected hota hai.
Lekin sabhi movements growth se related nahi hote. Jaise ek billi ka bhaagna, bacchon ka jhule par khelna, ya bhains ka cud chabana — ye sab movements growth ki wajah se nahi hote.
Ab sawal aata hai ki hum movement ko life se kyu jodte hain. Iska reason ye hai ki movement aksar environment me hone wale change ka response hota hai.
Jaise billi mouse ko dekh kar bhaagti hai. Yani usne environment me change notice kiya aur react kiya.
Living organisms environment ke changes ka fayda uthate hain. Jaise plants sunlight ki taraf grow karte hain. Bacche jhule par maza lene ke liye move karte hain. Bhains apna khana digest karne ke liye cud chabati hai.
Jab hamari aankhon par tez light padti hai ya hum kisi garam cheez ko touch karte hain, to hum turant react karte hain. Ye reaction hume protect karne ke liye hota hai.
Agar hum aur dhyan se soche, to pata chalta hai ki har movement properly controlled hota hai. Har type ka change ek specific aur sahi movement ko trigger karta hai.
Jaise class me jab hum dost se baat karte hain to dheere bolte hain, chillate nahi. Yani situation ke hisaab se movement change hota hai.
Iska matlab movement us event par depend karta hai jo usse trigger karta hai.
Controlled movement ke liye sabse pehle body ko environment me ho rahe changes ko pehchanna padta hai, phir uske hisaab se correct response dena padta hai.
Isliye living organisms ke paas special systems hote hain jo control aur coordination ka kaam karte hain.
Multicellular organisms, yani jinme bahut saare cells hote hain, unme specialised tissues hote hain jo control aur coordination ko manage karte hain.Writer has not written anything about themselves.
